About us
Fundashon Rumbo Noba a keda lantá riba 2 di desèmber 2021. Fundashon Rumbo Nobo ta un organisashon kristian ku ta dediká su mes na proklamashon di e Evangelio di Grasia lokalmente i internashonalmente i instrukshon di e Palabra di Dios i defensa di e Fe kristian. FRN ta enfoká riba duna informashon via di masa-media, media-sosial, kursonan, dunamentu di charla i organisashon di konferenshanan.
Konferensha Stima bèrdat Na Hulanda
Den su afan pa siña e palabra, FRN a tene un konferensha na Hulanda pa kreyentenan bibá na Hulanda. E konferensha a tuma lugá djasabra 5 di ougùstùs na Eindhoven; mainta 9.30 te 2’or atardi. Ounke e konferensha tabata dirigí na esnan di abla Papiamentu, tabatin partisipantenan di habla hulandes tambe pa ken mester a tradusí. Meta di e konferensha tabata pa hasi kreyentenan konsiente di mentiranan den nos mundu aktual. Fe Kristian ta mas i mas bou di atake di tur sorto di mentira.
Tabatin 4 charla ku a duna presentenan un bista di mentiranan ku Satanas ta presentá na nos. E promé charla tabata un introdukshon di e konferensha: e tabata un repaso bíbliko di e importansia pa kere, stima, proklamá i defendé e bèrdat. Tambe pa rechasá tur tipo di mentira ku Satanas ta usando pa mina e influensia di iglesia, dor di kontamin’é ku eror. Despues di e charla di introdukshon a sigui ku charla pa hòmber i muhé apart. E hòmbernan a tende i diskutí e konsepto bíbliko di maskulinidat en kontraste ku ideanan eroneo di hombresa. E muhénan a trata mentiranan tokante pensamentunan i aktitutnan pa ku sirkunstansianan difisil di bida. E mentiranan aki ta stroba nos di hasi e boluntat di Dios i kresementu spiritual. A klousurá e konferensha ku un charla pa tur hende huntu, den kua a duna un bista di mentiranan pafó di iglesia i mentiranan den iglesia. E informashon tabata pa kreyentenan bira konsiente i ta alerta di e mentiranan aki. Tur kreyente mester ta studiantenan serio di e Palabra pa asina por sa kiko ta e bèrdat i rekonosé mentira. Asina nos por dil ku e atakenan riba fe Kristian. Pero no solamente studia i krese den konosementu di e palabra, pero tambe dor di keda siña otronan, prediká i proklamá e bèrdat den tur situashon.
Nos por a konta ku un partisipashon di 90 kreyente ku a bini for di diferente parti di Hulanda. E reakshon riba e konferensha tabata en general hopi positivo i satisfecho. Partisipantenan a ekspresá e deseo di por organisá mas konferesha asina’ki den futuru.
Nos orashon ta ku kada partisipante lo bai bèk den su sírkulo i hasi un diferensha den e manera nan ta stima e bèrdat, tene duru na e bèrdat i kompartí e bèrdat ku otronan.
Nos ta gradisí Dios pa e kantidat di personanan ku a partisipá i pa e entusiasmo ku kua nan a partisipá. Tambe nos ta gradisí Dios pa e hendenan ku a yuda organisá e konferensha i tambe pa e manera ku tur kos a kana.
E DESISHON KLAVE DI BIDA!
Djabièrnè 14 aprel, Fundashon Rumbo Nobo a sigui ku su aktividatnan evangelístiko. Esaki tabata un anochi di ekspreshon kreativo variá rondó di e tema E DESISHON KLAVE DI BIDA. Tabatin kanto, kontamentu di kuenta, poesia, mímika, testimonionan personal i un mini-drama. E presentashon a tuma lugá dilanti un sala den Teater LUNA Blou di 130 persona. Kada presentashon i kada testimonio tabata un reto pa pone kada persona pensa riba e desishon di mas importante di nos bida. Calvin Varlack a reta presentenan pa medio di e mensahe ‘Bo bida den balansa’, ku ta mustra un hende su kondishon real dilanti Dios. Pasobra tur hende ta kulpabel dilanti Dios pasobra tur hende ta kibra e mandamentunan di Dios. Tambe e mini-drama ‘E porta’ a konfrontá hende ku e realidat ku tur hende mester ta kla pa topa nan KREADOR i ku e úniko desishon ku lo duna un hende entrada den shelu ta esun di kere den Kristu komo su salbador personal. Na final Calvin Varlack a reta esun ku nunka a tuma e desishon klave aki, pa hasié e anochi ei mes. Tabatin 4 reakshon positivo riba e reto aki. Nos ta gradisí Dios pa e manera El a obra pa medio un tremendo anochi di ekspreshon kreativo.
KONFERENSHA NASHONAL PA HÓBENNAN 100/100 PA KRISTU
Djabièrnè 7 – djasabra 8 òktober 2022
Fundashon Rumbo Nobo a organisá su promé konferensha 100/100 pa hóbennan. Meta di e konferensha ta pa duna hóbennan un reto bíbliko pa biba 100/100 pa Hesus. E motibu ku ke hasi e reto aki ta pasobra último añanan tin un falta di dedikashon kompleto na Kristu bou di hóbennan kristian. Hopi hóben a stòp di bai iglesia .
E konferensha a tuma lugá den edifisio di Iglesia Hosanna. 10 iglesia a aseptá e invitashon pa patisipá na e konferensha ku nan hóbennan. Na tur tabatin un total di 205 partisipante. Nos ta gradisí Dios pa tur ku a asistí.
Pa medio di kantikanan spesial, testimonionan personal, skèchnan, diskushonnan kòrtiku, retonan kòrtiku i mensahenan a enfatisá e meta di e konferensha: Dediká bo mes pa biba 100/100 pa Kristu.
E tópikanan ku a keda tratá pa e 2 oradornan ku -Kenneth Balootje i Calvin Varlack- ta:
-
diosnan falsu di hubentut (kosnan ku ta stroba hóbennan pa ta 100/100 ku Hesus)
-
e plaga di ‘gewon’, ‘mi no sa’, ‘boka yen di djente’ (un aktitut indiferente pa ku kosnan importante di bida)
-
e Kristian ‘fake’
-
para pa ATM den un mundu seksualmente bruá
-
e lo kosta bo tur kos
E último mensahe , ‘E lo kosta bo tur kos’, tresí pa Kenneth Balootje tabata un reto pa e hóben tuma un desishon konsiente pa sigui Kristu na un manera dediká sabiendo kiko e lo kost’é. Na final di e mensahe aki a reto e hóbennan pa dediká nan mes pa biba 100/100 pa Kristu. Esnan ku a tuma un desishon pa ta 100/100 ku Hesus a haña un promesa skirbí i huntu a lesa e promesa aki.E promesa aki den forma di un sticker, nan por plak riba nan telefon komo un rekordatorio diario di nan desishon.
Nos por gradisí Dios pa un promé konferensha nashonal 100/100 ku Hesus.
Relato di workshop matrimonio
Djasabra 27 ougùstùs Fundashon Rumbo Nobo tabatin un workshop pa parehanan kasá òf ku ta planiando pa bai kasa. E tópiko di e workshop tabata “Kasá, manera mester ta”, presentá pa Calvin Varlack. Meta di e workshop tabata pa konsientisá parehanan di e filosofia bíbliko di matrimonio ya nan por aliniá nan relashon na dje. Tabatin 3 charla interkambiá ku tareanan ku e parehanan mester a traha riba dje mesora. Entre otro nan mester a identifiká ki tipo di matrimonio nan tin for di un lista di diferente tipo di matrimonio kon e no mester ta. E reto tabata pa traha riba un matrimonio ku ta Kristu séntriko. Tabatin un kantidat di 23 pareha i 4 persona sin nan partner; nan patisipashon tabata hopi bon. Tur reakshon i feedback riba e workshop tabata hopi positivo i entusiasmá. Na final a presentá e evangelio na e grupo i a reta partisipantenan ku no a hasi esei ainda, pa tuma un desishon pa kere den Kristu komo nan salbador personal. E workshop a tuma lugá den Restaurant Amazia den un ambiente agradabel ku a kontribuí na un mainta ameno.
Relato Anochi di Pelíkula Evangelístiko Bièrnèsantu
15 di aprel 2022
15 aprel 2022, esta bièrnèsantu, Fundashon Rumbo Nobo a organisá un anochi di pelíkula. E evento a tuma lugá na Sentro di Bario Otrabanda. E asistensia tabata kompleto! Nos a hasi orashon pa mínimalmente 75 hende bini i a bini alrededor di 190 hende.E grupo di estudio di beibel Rumbo Nobo ku ta studia beibel tur djadumingu atardi den Sentro di Bario Otrobanda, tabata instrumental den invitá hende bin e evento. A hasi promoshon pa medio di parti flyer den bario i pa medio di un flyer digital riba APP i FB. E boost di FB a yega 27.162 hende. Di e grupo ku a asistí na e evento, mayoria tabata invitadonan di e bario di Otrabanda mes! Esaki ta un desaroyo masha positivo. A pasa e pelíkula ‘La vida di Jesus’ ku ta basá riba e evangelio di Huan.E pelíkula ta reta hende pa pone nan fe den Hesus komo e Mesias i Señor i asina haña bida eterno. E públiko a sigui e pelíkula ku atenshon, ounke e pelikula a dura 3 ora. Ora di e invitashon na final pa tuma un desishon pa sigui Kristu, hopi hende a indiká ku nan man ku nan ta kere den Hesus, di kua 9 a yena e slep di desishon. A invitá tur pa djòin e estudio di Beibel di djadumingu atardi. Aki bou algun potrèt di e evento.
All Videos
Medionan
-
1.Kursonan básiko di Beibel
-
(individualmente, den grupo chikitu, den instansianan i institutonan, digital)
-
2.Operashon di e radio di Internèt, ‘Radio Rumbo Nobo’
-
3.Produkshon di programanan di radio i TV
-
4.Organisashon di Kampaña Evangelístiko i Konferensia Bíbliko
-
5.Organisashon di kampamentu i konferensia di hubentut
-
6.Formashon di líder pa guía ministerio di hubentut
-
7.Produkshon i presentashon di obranan teatral den bario, instansianan i teatronan nashonal
-
8.Produkshon di material di estudio di beibel, buki kristian, revista, foyeto
-
9.Plantamentu di iglesia nobo tantu lokal komo internashonal
-
10.Establesé organisashonnan ruman independiente, manera ‘Fundashon Rumbo Nobo’ den eksterior
Nos Metanan
-
Predikamentu di e Evangelio na hóben, hóben-adulto i adulto, sea individualmente òf den grupo, na skol, den bario, den instansianan i pa medio di masa media i media sosial.
-
Dunamentu di charla i konferensia bíbliko
-
Dunamentu di kursonan di Beibel evangelístiko i edifikativo
-
Fundashon di iglesia nobo
Fundashon
Rumbo Nobo
©2022 by Fundashon Rumbo Nobo